الحياة حلوة للي يصالحها

بتعجبني اوي الشركات اللي بتسوق المنتج بتاعها بعبارات ملهمة وببعد أكبر من مجرد مواصفات المنتج فتعمل رابط بينك وبينه 

✏ كنت هكتب تعليق ع العبارة دي اللي كاتبينها على علبة النسكافيه من يومين .. لكن فعلا كان أفضل إني أجلتها عشان أكتب وأنا متذوقة مواقف حياتية جديدة

أخر موقف عديت بيه لما قفلوا الفتحة ف صلاح سالم اللي بتدخل على حدايق القبة إتضايقت طبعا شوية .. لكن صديق عزيز ليا بيسعفني دايما ف المواقف الصعبة قالي على مدخل بديل من جوه نفق كدا بيطلع على نفس المكان .. ولما تكيفت مع الوضع وبقيت امشي من جوه النفق لقيت حاجة الحياة كتير بتعملها معانا (و بيستخدمها رب الحياة عشان يعلمنا درس مهم) إنهم فتحوا الفتحة تاني .

هو كدا ..لما تكبر ومتقفش على كل حاجة بتمشي عكس اللي مريحك وتمط كدا وتبقى مرن 😄..وتكمل حياتك عادي ..تلاقيها فتحت تاني ..وساعات بتفتح ف حاجات اكبر واحسن 

الحياة حلوة مش للي محقق كل أحلامه فيها 

الحياة حلوة مش للي شغال ف شركة عالمية او بيقبض بالدولار او متجوز أو مخلف او عايش بس عشان يتلذذ بمتعها ..او ..او ... إلخ

"الحياة حلوة للي مصالحها" ..

🎭 يعني عارف تتعايش معاها بحلوها وبمرها .. 😁 عارف تنبسط ف اي وضع وفي اي ظرف .. ☔ عارف تكون مرن وتقبل تغيير الخطط المفاجأة واللغبطة اللي ساعات كتيرة بتحصل عكس خططك .. 👓 عارف تتكيف لو باب إتقفل ف وشك فتدور على باب تاني .. 🙏 عارف تشكر ف القليل وبتطمح للأحسن بدون تذمر او مقارنه مع حد تاني ... ❤ عارف تصدق ف الحب حتى لو قابلت علاقات كتيرة محبطة في الطريق ... 💎 عارف تقبل ألام الحياة وإحباطاتها وواثق إن كل حاجة بتحصل ليها معنى لحياتك .. 🎯 وعارف إن أحسن طريقة للمصالحة مع الحياة إنك تقف وقفة البطل والشخص المسئول عن حياته لإيجاد رساله ومعنى ليها .. مش الشخص المستسلم ومستني يشوف الحياة هتوديه بكره لفين .. مستني دايما يتعمل فيه مش يعمل ..زي السمكة الميتة اللس بيحلمها التيار ويجرفها 

إتصالح مع نفسك تتصالح مع الحياة ..تعيش حياة ليها معنى

@ Jackie.Y.G

إنت مش لوحدك

صوت وجع بيزن لقيته طالع من صباعي

ولما بصيت لقيت جرح بسيط جدا لا يذكر .. لكن بالتأكيد كان مسبب ألم وتشويش ومش عارفة أستخدمه بنفس كفاءة إخواته 😏

رغم ان الصباع دا بس هو اللي مدوحس 😄 لكن الجسم كله حاسس بالألم .. ودا اللي بيتكلم عنه الكتاب إن كلنا أعضاء لجسد واحد، ولو عضو واحد بيتألم فجميع الأعضاء تتألم أيضا معه... وهو دا اللي بيقوي ويعضد حياة المحبة و الشركة، وبالتالي يتكون مجتمع صحي ومترابط.

الألم فعلا نعمة ..لأنه بيدل على إن الخلايا والأعصاب والأنسجة حية وبخير، وكمان بيدل على سلامة الموصلات الحسية والعصبية اللي بتوصل رسايل خطر للجهاز العصبي اللي منها المخ واللي بدوره بيدي أوامره لليد وللصباع عشان يخلي باله في تحركاته وعشان نديله إهتمام أكبر لغاية ما يخف ..
🔔 وزي ما الجسد بيتجرح ويتألم كمان النفس بتتجرح وبتتألم كجهاز إنذار عشان ينبهك إنك لازم تاخد خطوة وتطلب مساعدة .. 🔕 والإهمال المتكرر لجهاز الإنذار اللي زرعه ربنا فينا لفايدتنا بيسبب أضرار جسيمة مش بس للصباع المصاب لكن لكل الجسد. ..

👥 عشان كدا أحب أقولك إنك لما تكون متعطل لسبب ما في حياتك.. إنت مش واقف كدا متعطل لوحدك ..لا ..إنت مؤثر جدا لدرجة إن كل الأعضاء حواليك هيتأثروا .. لاننا زي ما قلنا جسد واحد ..فلو الرجل متعطلة أكيد الجسد مش هيجري أسرع وهيعرج، ولان العلاقات كلها زي السلسة ..فلما تكون مش قادر تقوم بدورك ف المكان اللي إنت فيه تأكد إن دا هيؤثر في من حولك، واللي بدورهم هيؤثروا فيمن حولهم ..والدواير توسع .. شفت إنت أد إيه مهم ومؤثر ?

🔍 🔍 وهنا بدعوك عزيزي القارئ للتفكير والتأمل في النقاط التالية: ❓ هل بتهرب من ألم معين في حياتك (خسائر متكررة ف العلاقات، عدم القدرة على ضبط مشاعرك او التواصل مع أعماقك، خسارة أحد الأحباء، علاقة متوترة مع الأهل..إلخ)
❓ هل بتلجأ لمسكنات للألم (علاقات، شغل، إنجاز، خدمة، إدمان معين) بدلا من مواجهة ألمك لمعرفة أسبابه
❓ لو مش حاسس بأي ألم ف حياتك إحذر ..ربما تكون هناك أجزاء من نفسك قد ماتت وفقدت كل إحساس نتيجة خبطات متكررة وإهمال كبير .. ربما قد جاء الوقت لتبحث كيف تحييها ..وتأكد إنه فيه أمل تصحى وتحس من جديد
❓ هل إنت بالعكس: حاسس إنك غرقان ف نفسك وف ألمك بقالك فترة كبيرة لدرجة إنك مش عارف تستمتع بحياتك ودايما بتطلب عناية وإهتمام من اللي حواليك بصورة مبالغ فيها
❓ إمتى أخر مرة حسيت بألم وصراع حد حواليك وفكرت تقدمله مساعده او تشجيع أو حتى صليت ليه?

😑😢 هل خايف من إنك تتكلم عن ألمك وشايف إن محدش هيفهمك او هيحس بيك ..أو بتتكلم مع نفسك بلغة المسكين" مش عايز أتقل على حد وأتعبه معايا"?!! إسمحلي إني أقولك إن تفكيرك مش سليم ..إنت تستحق أن تتلقى المساعدة والإهتمام، فيه ناس حقيقية مستعدة تسمعك من غير حكم ، لكن تحس بيك وتساعدك لغاية ما تعدي بالمرحلة اللي إنت بتمر بيها .. لو معندكش حد يسمعك إبعتلي ع الخاص وأنا سأقوم بتوجيهك لمن يستطيع مساعدتك  .... وليكن الرب معاك ومعي ..صلي لأجلي

#إنت_مش_لوحدك
#مشاركة #مجتمع #ألم #صحي #مواجدة #تعافي #مؤازرة #مساندة #تعليم #معالجة #تواضع #إقرار #ضعف #عجز #علاج #تقدم #إحساس #مشاعر #رجاء #أمل

@ Jackie.Y.G

قل ولا تقل

#العمق مش عكس #التلقائية والشقاوة و والإنبساط
لكن عكس العمق: التفاهة و #السطحية.

#النضوج مش عكس #الطفولة .. لكن عكس النضوج: #المعيلة (إنك تتقمص، تنسحب وتقول مش لاعب، متحسش بالأخر، تنشغل بس بنفسك وبإحتياجاتك ..إلخ).

❌ متقولش أنا عايز أسطح عشان أنبسط ..
☑ لكن قول: أنا عايز أكون تلقائي أكتر ..
▫أدخل للعمق والعمق هيجيب تلقائية وإنبساط حقيقي

❌ متقولش أنا كبرت .. الطفولة راحت خلاص
☑ لكن قول: أنا مهما كبرت هفضل محتاج لصفات الطفولة من بساطة وبراءة و.... و... إلخ تفضل معايا
▫إسعى للنضوج والنضوج هيحمي الطفولة اللي جواك


#عمق #بساطة #تلقائية #شقاوة #لعب #إنبساط #نضوج #معيلة #طفولة #إستمتاع #قل #ولا_تقل #عكوسات

@ Jackie.Y.G