عزيزتي الليدي السنجل الجميلة البسيطة كدا ف نفسك

عزيزتي الليدي السنجل الجميلة البسيطة كدا ف نفسك .. 

إوعي تنبهري بالسنجل الجنتل اللي متقدملك فبيفتحلك بقى باب العربية ..أو يقولك كلام تحسيه كدا عميق وبيطلع شرارة ونور وحرارة ... أو باللي بيستعرضلك شهاداته وإنجازاته .. ومتديش ودنك أوي بردو لكلام الناس عليه إنه جنتله كدا وإبن ناس ..

أو إنك تقولي: إدا الله دا عنده نفس أحلامي ..والغريبة بيحب نفس أكلاتي !!!
إنتي قطة جميلة نونو 😻 ?!

ليه بقى بقولك الكلام دا?!

لأن حضرتك الكلام النواعم وقت الهدوء حمادة ..لكن وقت الإختلاف ف الرأي ووقت الضغط حمادة تاني خالص 

طبعا مش بقولك روحي إختلفي وإتخانقي دلوقتي لا سمح الله 👿 . لكن ببساطة خليكي على طبيعتك ..

مش موافقة ? إعترضي

متضايقة ? عبري 

جواكي مخاوف ? شاركي 

ساعتها هيبان إذا كان القمور عايزك كدا تفضلي واحدة كيوت تتحطي ف الميدالية .. ولا راجل سوي عارف يقبل الإختلاف وعارف يتعامل مع تقلباتك زي ما حضرتك المفروض تكوني بتحاولي تبقي سوية قادرة تتعاملي مع تقلباته .. لأن أكيد بعد الجواز حضرتك عارفة إن حرارة الفرن هتعلى ..مش فرن الحب والشوق لا سمح الله ..لكن فرن الضغوط والتحديات والمشاكل اللي هتحدفها عليكم الحياة ..

فخليكي ناصحة وبلاش الرقة الجميلة دي طول الوقت (حلو طبعا تكوني على طبيعتك رقيقة) بس عايزة أفكرك ان إنتي كمان جواكي قوة وطاقة بخلاف الرقة لازم تطلع .. فلفحة وهبوة مقدما من الفرن مش هتخسر 😅

ساعتها لما تشوفي يا إما هيطلع المارد اللي جواه (الشهم الجنتل بجد) ولا هيطلع قزم إسود صغير معفن 👺 😄

معلش قلبت على خالتي بهانة .. بس يهده الواقع والنفسنة ..فتكم بخير وبعيد عن كل نفسنة😎

@Jackie.Y.G.I

لكل رجل حقيقي .. أنت عملة نادرة

قابلت في طريقي كثيرون من الذكور .. ولكن رجال قليلون جدا جدا جدا .. يعدوا على الأصابع... الفارق واضح وكبير ... 

سعيدة بقوتي لأنها جعلت الذكور ترحل هاربة شاعرة بالدونية والتهديد والفرهدة 😂 .. فاضحة كذبهم وتمثيلهم وكثرة كلامهم المعسول أو الذي بدون حساب أو مصداقية

وممتنة لها لأنها جعلت الرجال الحقيقيون يظهرون .. في وجودها (أي قوتي) متسعون ومرحبون ..وفي ضعفي متواجدون وعاضدون ... فهم وحدهم لهم إمتياز وبركة رؤية الضعف

شكرا لكل رجل حقيقي .. أنت عملة نادرة 🌷

@Jackie.Y.G.I

أهم شرط لنجاح العلاقة بين الرجل والمرأة / لكي سيدتي

إتعلمنا من طفولتنا إننا لازم نتعب عشان نحصد أحسن النتائج

وتلقائيا لقينا نفسنا بنعمل كدا ف علاقاتنا (بتكلم عن علاقات بين اشخاص كبيرة وناضجة.. وبالأخص بين رجل وإمرأة ..مش بين أم وطفلها مثلا) .. فتبص تلاقي طرف بيحاول يعمل المستحيل عشان يكسب ويرضي الطرف التاني .. فهو يبطل يعمل الحاجات اللي نفسه فيها عشانها .. وهي تفضل تهتم بيه وتحاول تولعله صوابعها العشرة .. الأمر اللي غالبا بيخلي الطرف اللي بيعمل كدا بيولع ف نفسه وبيتحرق .. 

والعلاقة بتبوظ وتتطفي

أخطر شئ هو إننا نسلك ف العلاقات بالفطرة .. لازم نقرا ونتعلم ازاي نعرف نقرب من الطرف التاني ..ودا بيتطلب وقفة مع كل موقف عشان نشوف عملنا ايه غلط ونتعلم منه ..وإزاي نتصرف بطريقة أفضل المرة الجاية .. ومن الدروس المهمة اللي إتعلمتها وكانت جديدة وغريبة بالنسبالي: إن أهم شرط لنجاح العلاقة بين الرجل والمرأة .. وبالتحدد بوجه كلامي لبنات جنسي : هو إنك تهتمي بنفسك !!

 أيوه ..إنتي قريتي صح .. تهتمي بنفسك وتخلي كل شي يحصل تلقائي ..

تهتمي بنفسك يعني:

👈  متحرقيش ذهنك كتير ف التفكير إزاي تكسبيه  

Stop the over- thinking

👈 تبطلي تقلقي بخصوص النتائج وإستمعي باللحظة 

Stop worrying... Don't care about Outcome & enjoy the current moment

👈 تهتمي بثقتك ف بنفسك عشان تصرفاتك تكون تلقائية مش مفتعله 

Be confident & Spontaneous

👈 إستمري ف إنك تستمتعي بحياتك من غيره بإنك تمارسي الأنشطة والهوايات بتاعتك وف إنك تشوفي أصحابك وتمارسي حياتك عادي خالص 

Enjoy your everyday life ..& keep doing what makes u happy without him

👈 إنك تكوني حقيقية ..وتشاركي مشاعرك وضعفاتك بأمانة .. مش لازم نبقي دايما ف صورة البطل اللي بينقذ العلاقة وبيحاول يحافظ عليها 

Be authentic & real

النقط اللي يمكن تبدو بالنسبالك تافهة وبسيطة دي هي اللي هتخليكي تكوني نفسك .. اللي هي أهم جزئية لنجاح أي علاقة ..واللي هتساعدك تكوني دايما مستقرة نفسيا ..مش بتلقي بأعباءك النفسية عليه (مش بلغي إحتياجنا للمساعدة، لكن فيه أمور إنتي اللي لازم تشتغلي عليها بنفسك)، كمان هيساعدك إنك تكوني هادية وملهمة .. وبكدا هيساعدك تقفلي الباب ف وجه اي خوف او قلق او توتر .. الأمور اللي بتخلي ردود أفعالك مش منطقية ومش مناسبة للموقف .. وبتخلي العلاقة تبوظ.

إهتمي بنفسك .. كوني نفسك .. لأن نفسك الحقيقية هي أهم عنصر لنجاح أي علاقة .. وعشان متحسيش بالذنب: دا إسمه شغل بردو ..يعني مش سلبيه، بس توجيه تركيزك وشغلك يكون على نفسك .. مش على الطرف الأخر ف العلاقة

بفكرك تاني بالقاعدة الجديدة دي والمهمة لنجاح اي علاقة:

Be YOURSELF .. Do LESS to get MORE

@Jackie.Y.G.I