بتحب/ي تساعد/ي كل إللي حواليك/ي ؟؟ خلي بالك ...Empathy Fatigue

عايزة اشارككم بحاجة موجودة ف الأشخاص إللي عندهم تعاطف عالي .. ألا وهي: 

التفاني في مساعدة الأخرين، وعلى الرغم من إنها صفة حلوة وعملة نادرة في زماننا الأناني دا  ..لكن فيها حتة غير صحية وممكن تؤذيك/ي لما متحطش حدود لمحبتك ولما تشعر/ي بالذنب .. زي لما تقول/ي لنفسك :"كان ممكن أكون لطيفة اكتر " او "كان ممكن أساعدها اكتر " او "اللي عملته مش كفاية" ..إلخ.

وتبص تلاقي نفسك كأنك ماكينة بيتحرق موتورها من كتر البذل والعطاء والتضحية ..دي ظاهرة بيقولوا عليها العلماء " Compassion fatigue" ..يعني التعب والإرهاق من كتر التفهم أو التأثر بالطرف الأخر ..ودا مش بيخليكي بتتصرفي بطبيعية وتلقائية وممكن يخلص بطاريتك بعد الشر قبل ميعادها 😀

(ملحوظة : بحكم دراستي في المخ البشري والجهاز العصبي للإنسان، المصطلح دا مش دقيق لأن الـ Compassion مش بيسبب إحتراق، بالعكس، بينما الـ Empathy (التقمص الوجداني) هو الذي يسبب هذا الإحتراق (يعني المصطلح الأدق: Empathy Fatigue) وهكون بعمل عنها فيديو .. تابعوني في القناة وفعلوا الجرس عشان يوصلكم الجديد .. الرابط بنهاية المقال)

تعمل/ي إيه ?! 

1- إفحص دوافعك: 

لما تقرر انك عايز تساعد شخص ما إفحص الأول دوافعك وإتأكد إنك عشان فعلا عايز وقادر تساعد، مش عشان هتحس بالذنب لو مساعدتش.

2- عطاؤك الزيادة ممكن يؤذي الطرف الأخر!!

أيوة .. للأسف...إوعي تفتكري انك لما تعملي #كل حاجة للشخص اللي قدامك دا هيساعده، بالعكس انتي كدا بتعلميه التواكل عليكي وبتخليه يكسل يقوم بدوره .. إنتي عليكي دور والطرف التاني عليه دور اكبر لمساعدة نفسه، فإتعلمي ازاي تحطي حدود لعطاءك عشان يستمر لفترة اطول ..وصدقيني دا مش أنانية لكنه حكمة. 

3- إتعلم/ي تحب/ي نفسك:

أنا عارفة دي ثقافة غريبة ف المجتمع دا - لكن تأكد/ي انك لما تحبي وتهتمي بنفسك هتعرفي تدي بطريقة صحية اكتر وبحرية أكبر. (مثلا للسيدات: إخرجي - إتفسحي -إحضري حفلة موسيقية- روحي gym او جلسة ليزر او جاكوزي 😎😄 اي حتة تعجبك ...المهم تتعلمي تدلعي نفسك وتتواصلي مع نفسك الحقيقية من جديد)، ونفس الكلام للرجل (حط لنفسك قائمة بالحاجات إللي إنت بتحبها وعارف إنها بتساعدك تفصل .. وبينفع نجدد ونضيف أو نشيل من القائمة دي كل فترة).

4- إعترف بمحدوديتك:

لو مش قادر تدي او تساعد دلوقت قول "كان نفسي أقدملك كذا أو أكون معاك ..لكن سوري مش قادر أعمل دا دلوقتي" أو "أقدر أنضم ليكم المرة الجاية .." هينفع .. وصدقني الكون مش هيقف ولا هينهار لو وقفت وريحت.

5- إعمل وقفة:

فيه وقت لازم هتنسحب وتوقف مساعدة (سواء للأبد او لمده معينه دي ترجعلك وتختلف حسب موقفك ودورك) .. خصوصا لما تلاقي الطرف الاخر متكاسل ومتراخي او اصبح إعتمادي عليك بزيادة ...ولما هتنسحب او لما تاخدي اوقات راحلة لنفسك هتلاقي مشاعر الذنب بتلاحقك وتقولك: "انت ازاي بتتفسح وهو متضايق ?! انتي ازاي نايمة وعيالك صاحيين ?!" لكن متخليهاش تتحكم فيكي، رد وقول: "أنا عملت اللي عليا ..هما عليهم دور، او انا مش ربنا عشان أعملهم كل حاجة، و جيب ورقة وقلم وإكتب لسته بالحاجات اللي عملتها وقدمتها وشجع نفسك. .. قول لنفسك "انا كمان أستحق اني اهتم بيا لأني أنا كمان مهمة / مهمة"

#حطي #حدود #لمحبتك #وعطاءك وربنا معاكم يا أبطال وتقدروا تكملوا مشواركم وانتم متعلمين ومتدربين ازاي تكونوا محبوبين وبتحبوا بشكل صحي ❤

@ Jackieyg

# Youtube Channel:

https://youtube.com/@JackieYGI?si=90jwx86jOeAPzFmm

# Facebook Page:

https://www.facebook.com/profile.php?id=100093185283806&mibextid=ZbWKwL