أثناء الإنتظار While waiting

بتجيلك أوقات تفكر فيها وتقول: هي صلاتي بتجيب أي نتجية ؟

هل صلاتي لفلان هتغير قلبه ؟ هل الموضوع الفلاني هيتحل ؟ هي ربنا هيديني سؤل قلبي ؟ هل .. وهل ...؟ 

يمكن بتجيلنا الأفكار دي بالذات لما الوقت يطول وتبتدي مشاعر الملل والزهق تتسلل لقلوبنا .. وبنتضايق لأننا مش شايفين ومش فاهمين.. والخطر كل الخطر هو لما يتملكنا الحزن والقلق بدل الفرحة، وتتوقف حياتنا لأننا منتظرين نشوف نتيجة صلواتنا .. او لأننا نفسنا ناخد وعد معين من الله لأجل حياتنا الشخصية 

عايزة أشارككم بفكرة جت في بالي النهاردة: إن كتير من أعمال الله العظيمة تحدث في الخفاء .. و على رأي المثل (لو ينفع نستخدمه لخدمة المعنى هنا) : "وما خفي كان أعظم" .. أعماله العظيمة تحدث في صمت .. لذلك تحتاج إلى صبر وثقة أثناء الإنتظار.

وأنا قاعدة بذاكر فجأة جاتلي رسالة تحديث من الجهاز .. والحقيقي كلماتها إستوقفتني لأنها متمشية مع الموضوع إللى كنت بفكر فيه، الكلمات دي بتقول: "إحنا بنعمل شغلنا من وراء الستار، إشعر بحرية إنك تستمر في عملك، وإحنا هنبلغك لما كل حاجة تخلص"

حسيتها رسالة شخصية ليا .. وممكن كمان تكون ليك:

الله بيعمل في الخفاء .. سيظل يعمل ولن يتوقف عن العمل، تغييره في قلبك أو في قلب أحباؤك عملية محتاجة وقت لأنها عملية تدريجية وشخصية جدا، فمش معنى إنك مش شايف إن مفيش حاجة بتتغير، وفي أثناء إنتظارك متوقفش حياتك مستني تشوف عمله؛ لكن إستمر تعيش وتحيا وتخدم وتشتغل ، وهو لما يخلص إللي بيعمله هيبلغك وهيوريك عظمة الأمور إللي كان بيجهزهالك في الخفاء .. فقط ثق وإنتظر بتوقع إيجابي ...إنتظار عامل مصحوب بالشكر والتسبيح ليه لأنه مش ناسيك .. هو أصلا مشغول بيك وعايزك تختبر حياة مليانة بالثمر والفرح والمحبة والسلام.. إعمل إنت دورك وسيب ربنا يقوم بدوره"

"I'm doing my work behind the scenes. Feel free to keep working & I'll let you know when everything is done" .. 
Signature: God your mighty savior