أيها ‏المتألم ‏..نحتاجك ‏

 

عارفة إنك بتتألم / إنك بتتألمي ..

إللي حصل معاك صادم وموجع ومؤلم ..

عايزة أقول رغم إنك بتجتاز ألمك الخاص بيك جدا .. وإللي طبيعي تحس إن محدش معاك فيه (حتى لو كان حواليك أصدقاء كثيرين ) لكن إسمحلي أطلب منك إنك ترفع نظرك حواليك ومتخليش ألمك يبتلعك ..

 حواليك إخوة كثيرين في البشرية نازفين ومحطمين ..

مش بقولك كدا عشان متعيطش أو متتألمش أو عشان تقارن وتقول إحنا أحسن من غيرنا كتير ..لأ.

لكن عشان عايزة أنبهك قبل ما تغرق في ألمك .. عايزة أقولك إنك تقدر تطلع من ألمك دا أقوى (حتى لو مش شايف دا دلوقتي من كتر دموعك) .. عايزة أقولك أنك هتكتشف جواك مصادر ومواهب ربنا حطها فيك عشان تنتشلك من وحل الأزمات والمصائب .. لكنك مش هتكتشفها لو فضلت مطول وغرقان في بركة الأسئلة والحسرة على نفسك.

بردو أقولك إن من حقك تسأل وتشك وتاخد رحلتك الخاصة بيك في ألمك ...

لكني مجرد صوت خافت بيفكرك إننا منتظرين رجوعك ..

مين إحنا ؟

إحنا إخوتك في البشرية المتألمين مثلك .. منتظرينك تكتشف بطلك الداخلي .. وترجع عشان تمد إيد وتساعد في إنتشال أبطال أخرين بيغرقوا في بركة أحزانهم ومشاكلهم .. إللي سكروا من شرب دموعهم كل يوم .. إللي مش شايفين كل الحقيقة لأنهم شايفين نفسهم بيتألموا لوحدهم وألمهم بدأ يقسي قلبهم ويخليهم أنانيين وبيجرحوا كمان في الأخرين 

صوتي مش هيبقى خافت لما تيجي وتضم صوتك لصوتي .. وتسند بإيدك المجروحة إيدي إللي ياما إتجرحت عشان نساعد إللي حوالينا...

إستيقظ أيها المتألم .. إنتبه لعقلك .. إنتبه لصوتك قبل أن يخرسه ألمك ..

أطلب الدعم .. أطلب المساندة .. أطلب الشفاء .. أطلب القوة .. أطلب إيجاد المعنى لحياتك والدعوة وسط كل ما يحدث ..

حتى ولو لم تجد أحد يساندك بل وجدتهم يدوسون على جرحك أكثر؛  ستجد موارد بداخلك .. ستجد الدعم في كتاب .. في تدريب .. في كتابة ... في شخص واحد يعرض عليك مساعدته وأنت تظن نفسك لا تستحق المساعدة .... وفوق الكل: في "الله" الذي ربما أنت لا تصدق أنه يحبك وسط كل ما يحدث لك ... ولكنه حقا يعشقك وهو الوحيد الذي معك طوال سكة رحلتك .. لم يكذب عليك ولم يقل أنه لن يوجد ألم...ولكنه وعد ان أن يعتني بك وأن يحول الشرور والأحداث القبيحة لخيرك ولمجده... لن يتركك ولن يتخلى عنك مثلما فعل هؤلاء اللذين تخلوا عنك...