أوقفوا توريث الصدمات ‏

بتعلم بقالي فترة طويلة حاجات كتيرة عن #الصدمات منها إن:

👈 الصدمات بتورث .. بتوصل لجينات الجنين وكمان في التربية

👈 أسلوب النشأة والتربية بيؤثروا مش بس ف شخصية الطفل، بل حتى في شكل الجسم وتكوينه !! أينعم 

👈 الجسم بيخزن الصدمات (مش بينساها) حتى لو العقل حاول يتناساها (كنوع من ميكانيزمات الدفاع ).. وبيظهر في صورة الشكاوي اللي بسمعها اغلب الوقت من الناس (ظهري ..رجلي ...عضلاتي.. دماغي ..قلبي !!)

الحقيقة أن كل مرة أدرس فيها بتعمق عن مخ وجسم الإنسان والصدمات وألتحق بدراسة مع ناس متلامسه مع نفسها وإنسانيتها أكتشف أن المجتمع اللي انا فيه مليان من ساسه لراسه بصدمات .. وإن أغلبية تصرفاتنا مع بعض (إن مكنش كلها لكن علموني معممش)  هي تصرفات غير ناضجة وغير واعية تماما لأن أغلبها ردود أفعال (وليست أفعال) ناتجة عن رغبة في حماية الذات أو الدفاع عن الذات ..اي ردود أفعال كان ينبغي أن يقوم بها الفرد أثناء مواجهته للظرف الصادم وليس بعدها ..وهو ما يسمونه Survival mode .. أي وضعية #الحماية ..وليس العيش أو الحياة living

- الولادة المتعثرة صدمة للجنين وللأم

- الخلافات الزوجية والانفصال والطلاق صدمة 

- الإساءات في التربية(ضرب أو شتائم أو مقارنة..إلخ) صدمة

- التحرشات والإغتصابات صدمة 

- رؤية مشاهد إباحية صدمة 

- حوادث السيارات والطريق صدمة 

- حوادث الغرق والإختناق صدمة 

- بتر عضو صدمة 

- الغياب عن الوعي أو أي حوادث طبية صدمة 

- وفاة أحد الأحباء فجأة صدمة 

- العمل المتواصل والضغوط الشديدة في العمل صدمة 

- عدم اخذ الكفاية من الراحة والنوم صدمة

الصدمة هي كل ما لا يستوعبه الجهاز العصبي ويعتبره تهديد لبقاء الإنسان .. لذا فالقائمة تتوالى 

قال و لسه بيتكلموا ان واحدة ست (لا و نصرانية) هي اللي كشفت شخصية #المتحرش !!!! ويا ترى نكشف شخصيته ولا حرام !! 

الحقيقة إننا (الباحثين والدارسين) محتاجين نعمل بحث خاص عن قائمة الأمور الصادمة والمغروسة في ثقافة وتقاليد شعبنا ، والمعتقدات المغلوطة من الأديان اللي توارثناها ولم نفهمها عشان #حرام نفهم كلام ربنا .. الموروثات اللي طلعت أجيال لا يستطيعون إستخدام عقلهم البشري، ولا منطقة الامور، ولا رؤية الواقع بصورة حيادية أو على حقيقته.. . لأنهم ببساطة أجيال معوجة معجونة بالصدمات ... صدمات مورثة من جيل لجيل .. أمراض عضوية ونفسية مورثة من جيل لجيل .. عدسات ملوثة ومشوهة مورثة من جيل لجيل  .. تسببت في تشويه رؤية كل شيء... فقبحت وشوهت الجميل (مثل جسد المرأة) .. وجملت القبيح (مثل تبرير كل الأفعال القبيحة). 

بشكر د. #محمد_طه وكل شخص بيستخدم علمه وثقافته عشان ينشر النور والوعي .. ويطلع الحشرات والعناكيب من أسفل أكوام وأكوام من الصدمات... أما الغير متعلمين والذين لم يبذلوا مجهود في فهم أنفسهم ومعالجتها؛ فأطلب منكم أن تخرسوا ..أيوة إخرسوا وتوقفوا عن إزعاج من حولكم بجهلكم وجعجعتكم ..وفروا طاقة الفتي بتاعتكم في الدراسة والعمل على أنفسكم .. 

أما اللي بيتعلموا لكن مش بيستخدموا تعليمهم عشان يطبقوه أولا على نفسهم، لكن عشان يشرحوا بيه (بشدة وفتحة الراء) اللي حواليهم أو عشان يفتخروا بشوية ورق عليه إسمهم ، فبطلب منكم تخرسوا بردوا لغاية ما تبقوا حقيقيين .. مش مستخبيين تحت شوية ورق مزيف حقيقتكم المسيئة والصادمة للي جايين يستغيثوا بيكم!! 

؟ طب يعني الدراسة والشغل على نفسي هيعصموني من الغلط ؟ وهيخلوني أكتب وأتكلم؟

لأ .. هتفضل تغلط ..لكن هتكون إنسان حقيقي ..بيقف مع نفسه عشان يراجع نفسه ويعتذر ويغير مساره ويساعد اللي حواليه... وحقيقيتك هتكون أقوى أداة في مساعدة الناس وفي كتاباتك .. أقوى حتى من كل شهاداتك.

الدراسة الحقيقية مؤلمة .. صعبة ..مضنية .. لكنها محررة 

#وقفوا  #توارث  #الصدمات 

Jackie.Y.G.I