"جريمة تعاطي مواد مخدرة" .. عبارة قريتها في مكان ووقفت عندها ..
يعني اكيد لازم يبقى فيه حساب ومسؤولية .. لكن ليه مش بسمع "مساعدة وتأهيل من يتعاطى مواد مخدرة ؟!" ..
ازاي اشهر العلماء والأطباء النفسيين في العالم بيعلموا عن "المخدرات" وأنها نعم اسلوب غير صحيح للتعامل مع جروح وندبات أغلبها من الطفوله بسبب إضراب التعلقAttachment disorder أو التعلق الممزق مع الاب والام ... لكنها لا يجب أن تلغي رؤيتنا لتلك الجروح العميقة وراءها .. وازاي أن أغلب ممن ذهبوا للمخدرات وتعافوا منها هم شخصيات حساسة جدا وموهوبة جدا جدا ولم يكن عندهم البنية النفسية القوية لتحمل صدمات الحياة مما جعلهم يلجأون لما يخدر ألامهم ... وعندما يتعافون يصنعون فرق كبير في حياة أخرين ..
وهنا الناس عاملة نفسها ألهة ونازلين جلد وحكم وهما لا فاهمين حاجة ولا شايفين أنهم نفسهم محتاجين علاج بسبب البلاوي اللي بيعملوها في عيالهم!!
شايفين بس اللي بيضرب مش متربي وفافي ..واللي بتبيع شرفها دي مش متربية .. ولا حد فاهم اي حاجة .. ولا حد بيشجع على تحمل مسئولية العلاج بدلا من الحكم والجلد .. وأغلبية اللي مش فاهم بيحكم ..وأغلبية اللي بيحكم هو نفسه عنده خلل نفسي او عقلي (ودا متزايد جدا في الزمن ال... اللي احنا عايشنه) .. وأغلبية اللي عندهم خلل اسالوا واذوا عيالهم أو آخرين .. ودوائر المخدرات والعلاقات الجنسية تنتشر وتوسع عشان محدش بيعترف بدوره او بمسئوليته.
يعني مين هيفهم الخلل اللي هيبقوا فيه أطفال لعدد أسرتين جيران ليا لان أمهم اللي محتاجة مساعدة نفسية نازلة صريخ وصويت وشتايم فيهم طول اليوم بطريقة حقيقي تعبر عن خلل نفسي ما ؟! وهل هتطلب مساعدة ولا هتكمل تطلع إضطرابها في العيال ؟! وكام واحدة هتقرا دا وهي بتعمل كدا في عيالها هتشوف أنه عادي ..اومال العيال بنجيبهم ليه؟! 
جريمة دي ولا مش جريمة ؟!
جريمة دي ولا مش جريمة ؟!طب والاب اللي بيشوف أفلام إباحية وولاده شايفينه ؟! أو اللي بيضرب امهم ..أو بيخونها وولاده فاقسين (البيچامة الحمرا يا رمضان!!) أو اللي اللي مغرق نفسه في الشغل عشان يهرب من مشاكله النفسية ؟! محدش ليه بيحاسب الناس دي او يقول إن دي جرائم؟!
طب كام واحد على كدا في مصر هيتقبض عليه بسبب المواد المخدرة ؟!! كام مدير في شركة ؟! طب كام وزير في وزارة ؟! وازاي نخلط اللي عنده تاريخ صعب من الصدمات بواحد بيعملها عشان بس ينبسط ويعدل الطاسة الفاضية اللي فوق رقبته ؟!!
كلامي مش هيوضح كل اللي أقصده ..لكني اتمنى فعلا أشوف نظام بيهتم بتقويم الخارجين عن القانون قبل ضربهم بطريقة مسيئة وغير آدمية تزيد من وحشية الوجع بداخلهم.. ونظام تعليم يعلم النسبة الأكبر من الشعب اللي مش فاضي غير أنه يحلل الأخر ويحكم أنه يحط لسانه جوه بقه ويشوف بلاويه الأول عشان صدقوني بقى فيه اضطراب عقلي ونفسي منتشر اوي ..وسطينا كلنا .. أيوة ... مش بس في القصص المرعبة اللي بتقروها قبل النوم !!
عايزين دليل سريع ع الماشي كدا؟ كل اللي كانوا بيهروا في قصة الإسماعيلية .. اشي تحليل نفسي ودماغي ..لا وبشطاره كدا من غير احتياج لمقابلة الجاني.. فزلكة عالية وبكلام هري منقطع النظير ملهوش اصلا اي اساس من الصحة حتى في العلم .. واشي نشر لصور وڤيدوهات .. إضطراب و خلل دا ولا مش خلل ؟! يا متعلمين يا بتوع المدارس !!!
No comments:
Post a Comment