توريث البركات بدلا من الصدمات !

لماذا لا أكتب عما يحدث في غزة ؟

لأنه ليس أول مرة أرى قتل وإبادة .. 

أراه بصور مختلفة و بصور أكثر خبثا .. نعم أكثر خبثا !!

أراه في بيوت يموت فيها الأطفال والشباب ..وممن ؟!! ليس من غريب .. ليس من عدو ..  بل من أهل بيتهم .. من أبويهم !

فكم الصراخ والأنين *الصامت* الذي يسمع فقط من السماء وفي حجرات العلاج النفسي رهيب .. 

شايفين اللي بقوله دراما ؟!

تعالوا أوريكم الدراما اللي بحق وحقيقي ...

كم الإغتصابات والزنا (ليست فقط الجنسية) ولكن إغتصابات الحقوق والزنا العاطفي Emotional incest لما بيتحول الأب عشان ياخد إحتياجاته النفسية من إبنته لأنه في خلاف مع زوجته ، أو لما تأخذ الأم إحتياجاتها النفسية من إبنها لأنها لا تعتبر وجود لزوجها ... وكأن فرحهم وسعادتهم لا يكونا إلا عندما يكون الأبناء وفقاً للي هما عاوزينه وبيحلموا يحلموا به !!!!! يعني الأبناء بيتحولوا لأدوات لتحقيق سعادة والديهم ..أو سبب تعاسة ليهم لو فشلوا في تحقيق أحلام والديهم اللي هما فشلوا في تحقيقها !!! فإذا لم يحققوا هذه الأحلام يسحب الوالدين ( أو أحدهم) حبهم ودعمهم وكلماتهم اللطيفة اللي كانت تقدم لأولادهم !!

مش دا إسمه إغتصاب وإبتزاز عاطفي ؟!!! 

ولا لما بتربوهم على أنهم ميغلطوش .. عايزنهم آلهه .. ويجيلهم زي شلل لما يكتشفوا إنهم أقل من آلهه وطلعوا محدودين ومش كاملين .. بيتجمدوا .. مبيقدروش ياخدوا قرارات لئلا يغلطوا .. مبيعرفوش يتحركوا لئلا يقعوا ..  بيخافوا يكبروا لئلا ينفصلوا عنكم ..رغم أن وجودكم خانقهم وشالل نموهم..ولكن بيخافوا يعبروا لئلا يتعاقبوا أو يترفضوا ..  فيفضلوا واقفين عند مرحلة الطفل اللي خايف يكبر أحسن ينفصلوا عنكم .. رغم أنه داخليا جزء كبير منهم حقيقي مش طايقكم  ..لكن حتى الجزء دا مش ملحوظ لأنه لازم يتدفن في العقل الباطن لئلا يسبب صراعات قاسية أوي ليهم ..ونتيجة الدفن ؟ وقف نمو وموت تدريجي بالبطئ .. تعذيب زي حجرات الإعدام بالغاز  !!

والنتيجة ؟!!!! عارفين إيه النتيجة يا سادة ؟!

شباب تايه .. حياته مليانه بالفشل والإحباط والشلل والإدمانات والإنتحار .. أمراض عضوية و إضطرابات نفسيه من سن صغير جداً  .. و منهم اللي عقله تعب لدرجة إنه بقى يشوف هلاوس ويسمع أصوات، وللأسف بدل التفهم والتعاطف إن الشخص دا مليان بالصدمات ..لأ .. بيتعلم عليه .. ويتم التنمر عليه من أغلبية مريضة متنمرة متعلموش غير القسوة دون الرحمة في بيوتهم المريضة !!

حطام بني آدمين يا سادة .. منهم اللي بيلف في دوائر بيكرر نفس غلطات والديه حتى سن كبير ..ربما حتى لسن ال ٦٠ !! (ميراث الصدمات)

شباب بيصرخ ويقول : "فين حقي؟!! ليه أعيش حياتي أدفع تمن اللي ابويا وأمي عملوه فيا ؟!! " وبدل ما يلاقوا إيدين بطبطب وتداوي الجرح ...يلاقوا ألف مطوى وسكينة تنخسه بكلام زي: "متجوزتش ليه لغاية دلوقتي! مش عاوز تخلف ليه!! إزاي مش بتشكر ربنا على أمك اللي ضحت بحياته وسعادتها عشان تربيك ؟ ليه غضبانه من أبوكي عشان راح إتجوز واحدة غير أمك .. هتغضبي على شرع ربنا ؟!!!!!!!!!!!!!!! 

أو: يا عم متعش دور الضحية (براڤو يا اللي بتوعظ بالعبارة دي ..  دا حقيقي ..اكيد عليه مسؤولية .. لكنه كمان لازم تفهم أنه مش بالسهولة دي لأن قبلها مراحل من النزيف والتلوي والصراخ من هول الصدمة، قبلها مراحل لازم أصلاً يخرج من دور السلبية ومحو الشخصية اللي كان السبب فيها والديهم واللي بيتهموه بالفشل وبأنه قايم بدور الضحية )!! 

طعن خبيث .. قماش مبلول زي بتاع ريا وسكينة كاتم للأنفاس !!

إغتصاب وقتل في البيوت كل يوم ... 

وتمام زي ما ناس معينة من شعب مضطرب مليان بالصدمات بيضرب في شعب تاني وبيدمره .. كذلك أباء وأمهات مضطربين ومليانين بالصدمات بيضربوا نار ..  اللي منها غير مرئية .. واللي منها للأسف مرئية لكن مستخبية تحت معتقدات مجتمعية بتتنفذ بصورة مشوهة !!

ولأني سامعة و شايفه ضرب النار والحرايق من زمان .. ولأن هو دا الطريق اللي كان بيؤهلني ليه إلهي عشان أمشي فيه (رغم صعوبته الشديدة) عشان أساعد اللي يتلحق..

 تمام كأني في أرض معركة رايحة لواحد ألملم أشلاءه .. وللتاني أعلمه إزاي يمشي بعكاز .. وواحد تالت إزاي يعيش حياته بإيد واحده ... لكن على المستوى النفسي .. ومنهم كتير أبطال ..بيتشفوا بل وكمان بيرجعوا للي جرحوهم عشان يغفروا ويقدموا ليهم يد المساعدة !! 

ولكن منهم للأسف اللي حتى إرادته إتعدمت .. ومحتاج لمعجزة تقومه !( وبتحدث ، ليس بالضرورة بصورة فجائية، لكن في صورة خطوات بسيطة تدريجية) 

ودي مجرد أمثلة بسيطة لحرب دايرة وقليلين اللي بيتكلموا عنها !!

فألمي مع شعب غزة موجود... لكن ألمي كمان موجود للشعوب المجني عليها في بيوتها .. مش قادرة أكتب عن قضية بالفعل فيه اللي بيكتبوا عنها لكن وقتي ومجهودي بقدمه في اللي اقدر أنا أعمله، فبخلاف جلساتي اللي بالنسبالي مش مجرد عمل أو وظيفة، لكن أقل واجب اقدر أعمله ليهم: إني أشارك ولو بجزء عن صراعاتهم في كتاباتي، لعل الجميع يستفيقوا والمجازر السرية دي تقف .. واللي لو موقفتش هنكون بنساهم في تكون أجيال ليست فقط محطمة، ولكن بها طاقة من الغضب المدمر الغير صحي والذي يشبه غضب المعتدي الحالي، لغة الضرب والدمار والدم هي اللغة الوحيدة!!

أكتب و لعل اللي في صراعات مع الألم أيضاً يستفيقوا ويطلبوا المساعدة .. فيا متعبين زي ما قريتوا في كلامي: اللي بيطلبوا المساعدة مش ناس ضعيفة ..لأ ..دول أبطال،  و فيه منهم شهداء .. لكن شهداء والديهم !!!

زي ما إحنا كبشر بنورث الصدمات ..هنقدر كمان بتعافينا نورث البركات 🌺

#ضحايا و #شهداء #والديهم #بركات #التعافي 

#jackie_yg #hb4hl 

#awarness #support #healing #MentalHealth