💗الحب (مواصفات الحب الحقيقي)💗
في الجزء الاول قلنا إن الحب الحقيقي بيسعى لخير وراحة وسعادة الاخر، وإنو لازم يكون فيه مجهود وبذل و ألم .. ليه لازم?? دا موضوعنا المرة دي
الإنسان بطبيعته بيميل لاي حاجة تديله راحة أولذة أو إشباع، وبالتالي بيبعد عن اي حاجة ممكن تسببله ألم او إزعاج او ضد رغبته في اللذه والاستمتاع.. 😋
ففي علاقة الإنسان بالنبات مثلا، ممكن الواحد يشوف وردة حلوة فيقطفها لانه عايز يشمها ويحتفظ ويستمتع بيها. .. ودي مفيهاش مشكلة لان الطبيعة مخلوقة لمتعة وإستخدام الإنسان 🌺
لكن الموضوع مختلف تماما مع البشر، ففي العلاقات السليمة والسوية مينفعش إنك تدخل في علاقة مع شخص أخر لمجرد إنك عايز تنبسط أو تستمتع أو تسدد إحتياح ليك (حتى لو كان للحب!) بغض النظر عن الطرف الأخر .. لأنك لما بتعمل كدا فإنت بتحول الأخر من شخص إلى شئ إنت بتستخدمه ..
حتى لو كان الطرف الاخر عايز يستخدمك نفس الإستخدام ..إنتم بكدا دخلتم في عملية مقايضة .. حاجة تاخدها قصاد حاجة بتديها ... ودي علاقة منفعة مش علاقة حب 🤝🏻😕
مثال
الحب الحقيقي فيه مجهود لأنك عمال تضبط نفسك وتقولها: مش مهم راحتك دلوقتي يا نفسي .. مش مهم اللي بحبه أنا دلوقتي
وفيه بذل لأنك بتقول لنفسك: لأ ، فتقرر إنك تؤجل إستمتاعك عشان الطرف الأخر مش قادر او مش عايز دلوقتي ..او انك تعمل حاجة عكس إرادتك تماما
وفيه ألم لأنك مش ماشي على هواك ومذاجك ..وطبعا كل التداريب دي فيها ألم
وقفة مع نفسك🤚🏻
🏆- عايزة أطمنك إن مش كل الحكاية مجهود وبذل وألم، لإن اللذة الحقيقية اللي بتدي إستمتاع بأي حاجة في الحياة هي اللي بتيجي مع الألم او بعد الألم !!
❤ -تأكد إنك لما بتقدم حب حقيقي إنت بكدا مستعد إنك تستقبل حب حقيقي ..ما إنت بردو ليك إحتياجات ولازم هتاخد ..لكن هتاخد حاجة صح ..مش مغشوشة
🎁- تذكر إن مع كل عطاء من القلب فيه أخذ يفرح القلب
⁉ طيب لو أما عملت كدا لكن في اوقات حسيت إني زهقت او مش عاوز ورجعت افكر في نفسي تاني، أعمل إيه⁉
No comments:
Post a Comment