من حقك تتفهم .. من حقك تتحس .. من حقك تطلب مساعدة

معلومة أول مرة اعرفها أثناء دراستي عن الإكتئاب:

دايما كنا فاكرين (من حوارات أغلبنا) إن المكتئب بيعاني من مشاعر خمول أو إرهاق وعدم نشاط ، مصحوب بمشاعر إنعدام القيمة وعدم التفاعل مع ظروف الحياة بل ربما عدم الرغبة في الحياة أصلا ، لكني الحقيقة وجدت إن أعراض الإكتئاب متنوعة تنوع كبير يتوقف على نوع الإكتئاب، فمنه مثلا:

• نوبة إكتئاب مصحوبة بمظاهر مختلطة ... يعني الشخص يكون عنده خليط من إكتئاب وهوس في وقت واحد .. بمعنى تاني إنه يكون عنده إرتفاع مستوى الثقة بالنفس، بيرغي ويتكلم كتييييييير أكثر من المعتاد، لأ وكمان عنده زيادة في النشاط ... فتلاقيه مندمج عادي في أنشطة إما اجتماعية أو في العمل ... إلخ.

وفيه كمان نوع إسمه:

• إكتئاب مع ظواهر لا نموذجية  Atypical Feature Specifier: ودا لما الشخص المكتئب يكون عنده قدرة إنه ينبسط مؤقتًا  بالأحداث السعيدة (خروجة، نشاط، إلخ) ويبقى عنده زيادة شهية، لكنه كمان عنده حاجةمفرطة للنوم، وكمان بيعاني من حساسية تجاه الرفض .. يعني يبقى قدام الناس كلها نشيط و Active لكنه من جواه متألم وعارف إنه لما هيروح هيغرق في حالة إكتئابه ويروح في النوووووووم.

عايزة أقول إيه من الكلام دا وليه بشاركه؟

1- عشان نحاول نتعلم منشوفش الناس بعينينا العادية و نبطل نحكم على الأخرين من تصرفاتهم الظاهرة وإللي ربما لا تفسر حالتهم الحقيقية.

2- عشان نبطل نعمل دكاترة وأخصائيين نفسيين .. ونفهم إننا ملناش أي حق في تشخيص حالة أي شخص حوالينا؛ ودا لأن التشخيص ليه مراحل وسمات ومعايير وإختبارات وفحوصات بيتم مراجعة نتائجها ومقارنتها بمعايير دولية متفق عليها ( زي الدليل التشخيصي والإحصائي للإضطرابات النفسية) ولأن كمان فيه أعراض متشابهة لمرضين مختلفين تماما لكن بيفرق بينهم شعرة إسمها : التشخيص الفارق.

3- عشان أشجع كل واحد بيقرا كلامي إنه لو حاسس إنه مش تمام، رغم إنه مهايبر وبيروح وييجي ويعمل أنشطة والناس شايفاه تمام لكنه هو حاسس إنه مش جواه #مش #تمام: إنه يروح يطلب مساعدة من حد متخصص لأنك تستحق إنك تتساعد وتتسند على حد يقف جنبك .. وأشجعك تطلب مساعدة بسرعة قبل ما الوضع يسوء.


من حقك تتفهم .. من حقك تتحس .. من حقك تطلب مساعدة

(ملحوظة هامة: برجاء الذهاب لأخصائي نفسي أو مشير وليس فقط إلى طبيب نفسي حيث ليس كل حالات الإكتئاب تحتاج إلى علاج دوائي .. فقط الحالات المتوسطة والقوية من الإكتئاب ، وحتى هذه الحالات لابد من وجود مشورة لأهميتها في تقوية العضلات النفسية وتصحيح الأفكار بجانب الأدوية ... بالمختصر: لا تكتفي بطبيب نفسي يجلس معك فقط 10 دقائق ويكتب لك أدوية .. الأدوية مسكن ومهدئ وليس علاج)