أحبك ‏.. ‏أكرهك ‏!!!

في مؤتمر دولي عن الصدمات وفي محاضرة تبع دراستي بالأمس تناولوا نفس الموضوع ألا وهو: إزدواجية المشاعر في العلاقة ... و عرفت إن ممكن شخص يحصله أزمات نفسية شديدة جدا مش لأن العلاقة كلها عنف او إساءات ..لأ .. لكن لأن فيها حبة فووووق وشوية حبااات تحت !

هتقولولي: مش كل العلاقات كدا ..ودا شئ طبيعي ..
هقولوكم: لأ... صبركم عليا أوضحلكم

نبتدي من الأم اللي بنشوفها عادي لما تضرب إبنها .. وبعديها بشوية تجيبله حاجة حلوة وتقوله مامي بتحبك .. او لما تزعق بعنف في وشه وتطلع فيه تعب يومها او كبت غضبها من زوجها العزيز وبعديها تضحك عشان حست بذنب إنها عملت كدا.. فقال إيه تنسيه ... قال إيه هو كائن صغير لا حول لها ولا قوة فمش هيتأثر أو مش هيفهم .. فيشرب بقى .. والحقيقة إنه بيشرب سم محطوط في العسل .. فلأن الولد لسه معندوش تفكير ناضج منطقي يبرر ليها تصرفاتها المضطربة واللي بتحمل إزدواجية عشان المسكينة إتلبخت في تربية العيال وطلبات البيت فمفكرتش تتعافى من إضطراباتها الشخصية ، يبتدي الولد بعد شوية يبقى مش فاهم هي مامتة بتحبه ولا بتكرهه ... ويكبر وهو عنده نفس السؤال .. لأ وكمان وهو عنده سؤال تاني شبهه ناحيتها "أنا بحبها ولا بكرهها ?!!!"

والولد يا عيني يجيله تفسخ في مخه نتيجة الصراع القوي جدا بين مشاعر الغضب تجاه والدته واللي بيكبته وبينكره عشان عيب وحرام (بعرف المجتمع اللي بيمنع التعبير عن المشاعر وبيعتبره من المحرمات)، وبين مشاعر الحب عشان بردو هي ربته وكبرته والذي منه وكدا... وأكيد شاف منها بردو حاجات حلوة .. وكمان لأن العقل الطبيعي ميعرفش يؤمن بحاجتين عكس بعض في نفس الوقت .. فلما يجمع بين حاجتين عكس بعض في نفس الوقت فدا عرض لحاجة إسمها Cognitive Dissonance  أو "التنافر / عدم الإنسجام المعرفي"

ويطلع الولد للمجتمع وهو مش متسجل ف دماغه اي مشاعر لحب حقيقي نقي صافي أصيل .. لا يحمل سوى إزدواجية وإضطرابات تشربها من أسرته وأسلوب تعاملهم معاه..
فيا إما يدخل في علاقات يشيِّب فيها الطرف الأخر لأنه لا عارف يحب ولا عارف يكون مستقر المشاعر ..ولا عارف يعرف ان جواه مشاعر غضب مدفونة ..
يا إما هو نفسه يدخل في علاقات مسيئة (وأحيانا يدور عليها لأنها النوع الوحيد اللي يعرفه) ويتعرض فيها لإساءات وإهانات ويبقى مش عارف يسيب العلاقة لأنه بيلاقي بردو فيها حاجات حلوة ولأن هو دا مفهوم الحب بالنسباله... مش كل العلاقات كدا ?!!!

لدرجة إن العلماء وجدوا مؤخرا إن فيه نوع من أنواع كرب ما بعد الصدمة PTSD فيها المريض بيعاني من ومضات Flashbacks من الماضي فيها ذكريات جيدة ولحظات كانت كويسة لكن ليها نفس تأثير الذكريات المؤلمة بإنها بتسبب كرب وضيق للمريض لأن العلاقة أصلا مسيئة ..
ولأنها حاجة جديدة مش مصنفه بشكل واضح في الدليل الإحصائي للأمراض العقلية الخامس DSM 5، فوضعوها تحت عنوان Atypical PTSD .

الشخص دا لما يحب يكتبلنا أغنية عن الحب، يكتبلنا أغنية بتوضح تفسخ مشاعره وإزدواجيته زي الأغنية المعروفة دي فيقول:

احبك اكرهك اسيبك اندهك
أعلق نفسى بيكي ولا اعمل فيكي ايه
اضمك ابعدك اخونك اوعدك
غريب احساسي بيكي مش مطمنله ليه

إحساسى ده ممكن يهد جبال يضيع
بين حبي ليكى وكرهى ليكى خيط رفيع
لا القرب مرتاحله ولا البعاد اقدر عليه

حاجات غريبه بحسها وانا بين ايديكي
كتير بخاف منك و كتير بخاف عليكي
لا القرب مرتاحله ولا البعاد اقدر عليه

أيوة .. أنت صح ..دي أغنية عمر دياب .. وإحنا نسمع ونسقف ونشرب الكلام من غير ما نكون فاهمين إن كل كلمة في الأغنية دي فيها تفسخ و إزدواحية واضحين جدا ...

المشاعر هي اللمبة الحمرا اللي ربنا حاططها جوانا عشان تنبهنا إنه يا إما جوانا أفكار أو معتقدات غلط، يا إما فيه حاجة حوالينا بتحصل غلط .. راجع نفسك وإفحص مشاعرك .. ويُفضَّل في ضوء شخص ناضج ومرشد ليك يكون مرآة حقيقية تعكس حقيقة مشاعرك.

يا كل أم وكل أب: مش عيب تطلبوا مساعدة

يا كل إبن وكل إبنة: من حقكم تطلبوا مساعدة 

دمتم بعافية.

#صدمات #صحة #تعافي #مشاعر #إزدواجية #حب_مشوه #حب_أصيل #تربية #شخصية #إضطراب #تعليم #تنوير #ثقافة #نضج #كرب_ما_بعد_الصدمة #أمومة #علاقات