الحلزونة

مخنا البشري فيه صفتين أصعب من بعض ومحتاجين مننا إنتباه:

اول صفة: "التحيز نحو السلبي" Negativity bias .. يعني إيه ؟؟

يعني ببساطة يومك كله يبقى كويس جدا لكن تقف عند موقف واحد سلبي حصل او كلمة واحدة سلبية إتقالتلك وتفضل مركز عليها ويليها طبعا مشاعر ضيق أو ... أو ..، المهم وكأنك بتنسى كل الاحداث التانية الحلوة اللي كانت في يومك 

ثاني صفة: إنه لما يصدق تركز ع السلبي يقوم يغرقك في حلزونة الأحداث السلبية (الحلزونة يامَّا الحلزونة ..بشدة الميم ) .. ويبقى عامل زي المغناطيس ... فالموقف يجيب موقف ..والذكرى تجيب ذكرى .. والكلام بيجيب كلام .. والدمعة اللي كانت على موقف ممكن يستحق انك تبكي عليه تجيب دمعة عشان انت دمعت فتقوم تعيط عشان انت دمعت .. أوم إيه : العياط يجيب عياط عشان انت عيطت وصعبت عليك نفسك وكدا .. (وكتاب حياتي يا عين !)

وتفضل الحلزونة تاخدك لتحت #لو #موقفتهاش ..

وكلمة لو موقفتهاش دي معانها انه في ايدك توقفها .. ولأن النزول سهل وسريعا جدا جدا، بينما الصعود اصعب ومحتاج مجهود ..عشان كدا إنت محتاج تبذل مجهود إنك تراقب أفكارك ..وإن مش كل فكرة تخطر على بالك تصدقها .. ووحياتك بلاش تصعب عليك نفسك عشان دا مش صحي وغالبا بتبقى تمثيلية درامية أخرجها مخك وخلاك بطلها المقهور عشان تعيط أكتر اول ما رجلك تيجي بس في الحلزونة (فاكرينها?!)

والحقيقية كمان إنه مش بس في ايدك توقف الحلزونة، لا ..دا كمان ممكن تدرب عقلك إنه يقلل عمق الحلزونة دي عشان متقعش فيها بسهولة او تغرق فيها لتحت أوي..ودا لما تدرب عقلك على الأفكار المنطقية (هنا إنت موقعتش ف الحلزونة) وحتى لما تحب تعيطلك شوية ميبقاش فيها شحتفة وكسرة نفس (لما وقعت ف الحلزونة مغرقتش)

عايزة أقولك حقيقية كمان عشان مبقاش بخدعك:

حتى لو عرفت تدرب عقلك ع الإيجابية والمنطقية وقلة الشحتفة ، إلا إنه بييجي للواحد أوقات بينسى فيها كل منطقية وبيحن كدا لأيام الشحتفة ودي ملهاش علاقة إنت واحد فرفوش ولا لأ ..دي طبيعة مخك زي ما شرحنا .. وغالباً دا بيحصل بعد يوم طويل مرهق أو بعد إنجاز ضخم ..او اي حاجة كبيرة سحبت منك طاقتك فمبقاش عندك طاقة إنك ترصد أو تقاوم أي أفكار سلبية أو غير منطقية بتجيلك .. وهنا بيفرق أوي حد يلحقك ويراجع معاك أفكارك وطريقة كلامك مع نفسك ..

وهنا فعلا بتشوف جمال إن واحد ينتشلك وإنت على اول سلمتين من الزحليقة ..ففعلا "إثنان خير من واحد .... لإنه إن وقع أحدهما يقيمه رفيقه"

حتى لو انت شخص كبير ومعروف انك حكيم وعلامة و .. .. هتجيلك الاوقات دي اللي هتتزحلق فيها ... فأرجوك متتكسفش إنك تكشف أفكارك لحد شايفك زي ما إنت ..حد تقدر تحكي معاه حتى الافكار اللي قد تبدو تافهة .. يقدر يسمعك من غير ما يحكم عليك لأنه عارف إنت أد إيه بطل .. وأد إيه حاربت وقاومت وإنتصرت على نفسك ... لكن كمان قابلك وقت ضعفك وإرهاقك ووقت ما بتروح منك .. مش مخك لأ (ليه التفكير السلبي دا بس ?! ) قصدت لما الأفكار المنطقية بتروح منك

دمتم بره الحلزونة

@ Jackie Y.G.I