رضا الرب من رضا الناس !!

 

مهم اوي تفكر ياترى إنت بتاخد صورتك عن نفسك وقيمتك من مين ؟

من كلام الناس ؟! يبقى مش هقدر تقول لأ للغلط وهتعيش عمرك تحرق نفسك في رضا كل اللي حواليك .. أصلك شايف أن رضا الناس من رضا ربنا عليك !!! (زي مقولة رضا الوالدين كدا  مع إعتراضي على الجملة دي لما تتقال ف المطلق كدا)

لو رضاك عن نفسك من رضا الناس عليك يبقى مش هتعرف تنسحب من علاقات مؤذية ولا هتعرف تحط حدود للي بيتجاوز معاك .. ولا هتعرف تعمل وقفة وتعيد تقييم بعض العلاقات... صدقني الإنحساب في أوقات بيكون غنيمة وتجديد للطاقة .. بتعرف بيها تشوف الصورة أوضح وتعرف بيها تحمي نفسك .. تعرف تقيم إذا كنت بتخسر نفسك في مقابل أنك تحس إنك محبوب ومقبول من الناس ولا لأ ..

فسؤالي ليك: بتعرف تنسحب وقت اللزوم ؟ بتعرف تقول لأ ؟ بتعرف تتقبل خسارة بعض الناس ؟ بتعرف تتحمل ضغط الرفض من بعض الناس ؟طبعا دي حاجات محتاجة قوة ومتانة نفسية وتدريب مش قليل.

كلمة في ودنك عكس كلام كتير بتسمعه حواليك:

مهم جدا انك في قلبك مش بتحتقر حد لأن كل الناس خليقة الله وكويس انك بحسب طاقتك تكون في سلام مع (كل) الناس .. لكن فيه جمل إعتراضية هنا:

١- أقلق منك لو بتقول انك عرفت تكسب رضا (كل الناس) ..دا المسيح والأنبية معملوهاش ! 

٢- فيه ناس مش هتعرف تكون في سلام معاها لأنها اصلا عايشة في عداوة مع نفسها ..ودي نوعية هنتكلم عنها بعدين ..

٣- مش لازم عشان تحس إنك كويس تسعى بكل ما فيك عشان تكسب كل الناس اللي حواليك ..

لأنه مش دافع سوي أساساً انك تكون كويس مع كل الناس #عشان تحس إنك كويس .. دا مرض خبيث جدا للأسف اللي واقع فيه بيعرف يخدع ناس كتيرة حواليه وهو كمان مصدق خداع نفسه وفاكر نفسه أن عنده مهارة أنه يكسب كل الناس !! وهو بس لو عرف الناس بتقول عليه ايه من وراه مكنش سعى بكل قوته كدا عشان يراضيهم وفي المقابل يخسر نفسه !

٤- عبارة "أصل الانسان ايه غير سيرة" ياريت بلاش تطبقها في المطلق وتفضل عايش خايف من كلام الناس عليك .. طول ما انت مش بتعمل شر .. وبتتصرف بدافع ان ربنا هو اللي شايفك اكتر من الناس .. سيب اللي يتغير يتغير .. وسيب أصحاب الألسنة اللي زي التعابين يقولوا اللي هيقولوه . في النهاية الله وحده له الحكم ومش هيجيب الناس عشان يسأل رأيهم عنك ! سيرتك هي اللي معروفة في الخفاء اكتر من المعروفة في العلن .. والله عيناه فاحصتان كل شئ وتعرفان الأسرار.

خلاصة القول: عايز تخسر نفسك ؟ أسعى انك تكسب كل الناس اللي حواليك

راجع نفسك لئلا يكون عندك اي أمراض خبيثة أو أي تعلق عاطشفي 

متتكسفش إنك تطلب مساعدة.

(ملحوظه: مهم مع كل رسالة تقرأها الا تأخذها في المطلق .. مهم أن يكون هناك أشخاص يعرفوا حالتك وظروفك حتى تعرف تأخذ ما يناسبك وتترك ما لا يناسبك)

~ رسائل من كتابي المستقبلي بإذن الله ~