لأنها
طول الوقت كانت قدام عينيا (بالكاميرا من يوليو ٢٠٢٤) حتى وأنا مش معاها
.. متابعة أدويتها.. أكلها وشربها ..نومها .. الدكاترة ..الجليسات ..كل
حاجة .. كأنها بقت طفلتي الصغيرة ..
وقت
الفقد صعب .. بروحي عارفة أنها مبسوطة دلوقتي وفي مكان أفضل ، لكن لسه
القلب والجسد متعلقين .. نفسهم يشوفوا مرة تانية .. مش مصدقين إن حتى
رؤيتها هيحتاج تغميض عينين عشان أشوفها بالإيمان مش بالعيان ..
دا غير العقل في المرحلة دي .. أسئلة .. "ماذا لو .. مش يمكن الحاجة الفلانية هي اللي سببت كذا وكذا" ..
ولما تيجي مرحلة مشاعر الذنب "كان المفروض مجبش الجليسة الفلانية .. وكان وكان .."
ومشاعر الغضب "التصرف الفلاني من الجليسة الفلانية، والممرضين والمستشفى المرادي كانوا مقصرين.." إلخكل
دا أنا كنت عارفاه في دراستي لمشورة الفقد والحزن Grief & Loss، ودا
مخليني عندي وعي وأنا بختبره دلوقتي بشكل عملي ، لكن وعيي لا يعني كبتي لما
يحدث داخلي أو تجاهله أو كما لا يعني إستسلامي له، لكن بشاركه بشكل مفتوح
عشان عارفة أن فيه زيي بيعدوا بالوقت دا لكن يمكن ميعرفوش أن كل دي أمور
طبيعية:
١) محاولة إيجاد اجابات عن الاسئلة والأسباب أمر طبيعي من العقل اللي مش بيحب النهايات المفتوحة ولا الأمور الغامضة
Especially when it comes to someone we love
٢)
مشاعر الذنب أمر طبيعي لأن الموت خارج نطاق سيطرتنا فعقلك بيصورلك إنك
قصرت في كذا فتحس بالذنب في كذا كنوع من أنواع السيطرة "إني لو كنت عملت
كذا كان ممكن فلان ميموتش"!
Trying to gain some control over what happened
٣)
إحساسك كأنك متبنج ، أو تايه، أو كأن دا كله مش حقيقي أو مش بتاعك،
بيعزوني أنا ؟!! (حتى لو كنت متوقع أن دا كان هيحصل..التوقع شئ وإختباره شئ
تاني)
This is not real ..it is not happening to me !!
في كل دا أحب أقول لنفسي ولكل حد بيمر بظروف فقد:
من حقك تشعر بالحزن و بالتعلق ، المشاعر دي #مش بتروح مع الوقت لكنها بتاخد أشكال وصور مختلفة
(ياللي
حوالين الشخص اللي فقد: بلاش تخرجوا المحزون عن حزنه بالعافية .. الحزن
مشاعر مهم نختبرها .. لا هو ضعف ولا هو قلة إيمان ... سيبوا الناس تهضم
مشاعرها بسرعتهم وبوقتهم) مفيش حاجة كان ممكن تعملها أو معملتهاش كان ممكن يوقف فقدك للي بتحبه.. الموت خارج سلطانك (ياللي حوالين الشخص اللي فقد: إياكم واللوم.. محدش مسؤول عن موت حد إلا لو كان جريمة قتل !!)
محاولاتك لإيجاد إجابات للأسئلة مش هتفيدك ومش هتوديك في أي حتة سوى أنها
هترهق دماغك ... حاول تفصل وتهدأ عشان تقدر تستقبل التعزية الإلهية جواك
...
(يا اللي حوالين الشخص اللي فقد: خلي كلامكم يكون قليل وخفيف .. بلاش
أسئلة ..بلاش نصائح ..بلاش وعظ ... بلاش كلام كتير وقصص ومشاركات شخصية
..المحزون معندوش طاقة لكل دا ..فقط قولوا هنصليلك ..هندعيلك .. احنا هنا
لو احتجت حاجة .. و #بس)
من الطبيعي ييجي وقت تبتسم بل حتى تضحك !! أيوة لما تفتكر مواقف جميلة
ومضحكة مع الشخص اللي فقدته ..الحب والسلام والإبتسامة ينفع يتواجدوا مع
الحزن دا مش جنون (يا اللي حوالين الشخص اللي فقد: بلاش أحكام ..خليكم في حالكم!)ولو حسيت انك مش عارف تختبرها أو تعديها لوحدك من فضلك أطلب المساعدة .. مش عيب ولا ينتقص منك.
بعد
المساعدة البشرية و قدام حقيقة الموت أو الإنتقال مفيش اي حاجة هتساعد
الشخص إنه يتعزي أو يحس أنه مسنود بجد من جوة (لا طقوس و لا عادات ولا
ممارسات) سوى علاقة حية حقيقية مع إله حي حقيقي ..لأنه مش إله أموات لكنه
إله أحياء ..الرحلة دي بتاعتك انت لوحدك وانت بس اللي ينفع تخوضها لوحدك
عشان تكتشفها، فليكن الله معك ومعي في رحلة الحزن والحرية 
No comments:
Post a Comment