عن الفقد والخسارة_٢

 

#عن_الفقد_٢ #أمي

كنت هتصل بيها أقولها زي ما إتعودت أنكشها:

"مامي .. بتمطر عندك زي ما بتمطر عندي ؟! " لكن للحظة إفتكرت إنها مش معايا بالجسد .. لكن كملت كلام معاها بالروح

دا مش جنون ولا أنت/ي بتخسر/ي عقلك

دي ملامح طبيعية من ملامح مراحل المرور بالفقد .. العلماء بيقوله إنها مشابهه للوالدين اللي عندهم طفل جديد فيما يعرف ب Baby brain .. أي وكأن المخ بقى أد مخ طفل لأنه فعلاً بيحصل تغييرات تشريحيه بتحصل في الحالتين: حالة الوالدين الجدد و حالة المحزون Bereaved الذي يمر بالفقد ، مع إختلاف إن الظرف الأول حدث مفرح وفي الثاني حدث حزين، من ضمن هذه التغييرات:

١- تغيير مؤقت في القشره الجبهيه Prefrontal cortex واللي بيساعد على التركيز وعلى أخذ القرارات وعلى التفكير بأسلوب منطقي وذلك لأن المخ الإنفعالي بيكون واخد حيز أكبر لأن المشاعر بتكون كبيره جدا ومستثارة مع الوضع الجديد، ففي حالة الوالدين الجدد ده بيساعدهم انهم ميركزوش في أي حاجه غير انهم يكونوا رابط عاطفي مع الطفل Bond /attachment ، بينما في حالة المحزون بتكون المشاعر حوالين فقد هذا الرابط Loss of Bond /attachment

٢- نتيجة النقطه الأولى؛ بيحدث نوع من الخلل في القدرة على التركيز في التفاصيل و القدرة على التذكر بنسب مختلفة، وكأنه هناك ضباب على الذهن Brain fog (مثلما حدث معي وكأني للحظة نسيت أن ماما مش موجودة بالجسد anymore )

٣- تغيير في التوازن الهرموني، فأيضاً نتيجة النقطه الأولى وهي: إما تكوين رابط مع الطفل والأعباء والضغوط الرهيبه في رعاية هذا الطفل الجديد، و إما خساره هذا الرابط مع المفقود (الذي يشكل عبء نفسي تتفاوت شدته حسب عدة أمور في الشخص المحزون مثل: طريقة تناوله لموضوع الفقد في حياته عموماً ، طبيعة العلاقة مع المنتقل، وجود دوائر دعم أم لا،.. وعدة أمور أخرى) .. كل هذا يسبب زياده نسبه الكورتيزول Cortisol (هرمون التعامل مع الضغوط) .. و إختلاف في نسبة هرمون الأوكسيتوسين Oxytocin (هرمون الحب والترابط،ووالذي يزيد في الوالدين الجدد بينما يحدث له نوع من الخلل والتناقص في حالة المحزون).

هل ده معناه ان الشخص المحزون مش هيعرف يعيش حياته طبيعي من تاني؟!

طريقة تناولنا للفقد مختلفه بإختلاف بصمات أصابعنا، وده راجع لحاجات كثيره جدا زي: تكوين الشخصيه ، وسائل الدعم ، التركيب النفسي، طريقة تناول المواقف السابقة في الحياة..وعدة عوامل أخرى، فكلمة #طبيعي هنا محتاجة إعادة تعريف لأن إيه هو الطبيعي ؟! وبحسب مين ؟ بحسب حياتك قبل الفقد ؟ ولا بحسب فلان اللي عدى بالفقد ؟! مفيش شكل طبيعي واحد ...

فبالنسبه لي انا عارفه انه حياتي اختلفت من بعد ما فقدت ماما ومش هترجع زي الطبيعي المعتاد بتاع قبل فقدها، لكن الطبيعي بتاعي دلوقتي هو إني ماشيه يوم بيوم بطبق كل اللي درسته واللي بستخدمه مع العملاء مع نفسي Walking the talk، وده مخليني قادره ان انا أكون بشتغل وبرجع للجلسات #بالتدريج Gradual، بنسبه صحيح أقل من الأول .. لكنها مناسبه مع وضعي الآن عشان أقدر أكون متواجدة بالكامل داخل الجلسة وأستخدم ألمي لمساعدة شخص أخر متألم #بدون ما أفقد عنايتي بنفسي أو أفقد تواصلي مع نفسي ومع ألمي.

(وده بردو فيه تحدى لفكره في أذهان بعض الناس إنه لو كملنا حياتنا دا يعتبر خيانه للشخص المفقود، وكأن لازم حياتنا تتوقف ونصير في حاله شلل كامل كأنه علامة تأكيد ودليل على مدى حبنا وتعلقنا للمفقود، ودي فكرة مغلوطة يمكن أكتب عنها في مره ثانيه)

ملخص:

النسيان وعدم التركيز أوقات أو لحظات من يومك: أمر طبيعي

الشعور (ولو للحظة ) أن الدنيا كلها رعد وبرق ومطر وساقعة (أقصد جواك): أمر طبيعي

إنك تعيط فجأة أو مشاعرك ككوكتيل تستثار بسهولة الوقت دا طبيعي (طبعا مش مبرر انك تغلط أو تجرح في حد، لكن بيفرق وجود ناس بتقدر وتعدي لما تغلط زي اي بني أدم طبيعي)

الطبيعي هو الطبيعي بتاعك دلوقتي في الرحلة بتاعة دلوقتي ..ملكش دعوة بالطبيعي بتاع أي حد تاني

عن خبرة (تتفق أو تختلف معي) عبور المرحلة دي من غير روح يقظة متواصله مع الإله هيكون أصعب جدا جدا..مش بقول أن التواصل الروحي بيخفف الألم، لكن فعلا بيسند وبيعزي مع الألم لأن موضوع الفقد في حد ذاته أبعد وأكبر من أنه يكون قضية نفسية فقط.

ربنا يسندنا جميعاً

👈 إضغط هنا لقراءة الجزء الأول

👈 إضغط هنا لقراءة الجزء الثالث

👈 إضغط هنا لقراءة الجزء الرابع

#Jackie_YG #HB4HL

#grief #loss #griefsupport #support #awarness #community