عندك علاقات حقيقية أو صحية في حياتك ؟

عايز تعرف إذا كان فيه أي دواير علاقات حقيقية او صحية في حياتك ? 

الدواير اللي تلاقي فيها ناس بتقبلك في اسوأ حالاتك (وإنت مضغوط او متنرفز او متلغبط، بمعنى مش في عادتك وحالتك الطبيعية) هي دي اللي نقدر نسميها فعلا "علاقة" .

لكن الدواير اللي فيها لازم تكون لطيف وحلو ومبتسم ومعطاء على طول، ولو بقيت غير كدا يتزعل منك وتترفض: إعرف إن دي مش علاقات اصلا، لكن دواير تمثيل أو إستغلال او اي تعامل سطحي، ودا ممكن يشكل ضغط نفسي عليك لانك دايما لازم تكون في الصورة اللي الناس متوقعاها منك ..مش على طبيعتك. وخطورته إنه ممكن يوقعك في كذا فخ :

👈 أولهم: فخ إرضاء الناس دول عشان ميزعلوش منك، فتبقى دايما حريص إنك متزعلهمش منك.

👈 ثانيا: فخ فقدان التواصل مع نفسك الحقيقية (الغضبانة والمتاضيقة والضعيفة والهشة في الوقت دا) لأنك هتلبس القناع اللي الناس عايزه تشوفه منك.

👈 ثالثا: فخ عدم القدرة على التواصل الحقيقي مع الأخرين، لان التواصل الحقيقي يعني ذاتي الحقيقية تتلامس مع ذات الاخر الحقيقية بدون اي خداع. وإعرف إنك في الوقت اللي بتقبل فيه انك تظهر ضعفك و مضايقتك - بصورة لا تهين احد - انت كمان بتحث الآخرين من حولك إنهم يكونوا حقيقيين بدون خجل.

وقبول بعضنا البعض في اوقات ضعفاتنا بيخلق جو آمن بيساعد الكل في الدايرة دي انهم يكونوا زي ما هما ... ناس حقيقيين .. ويثقوا انهم هيفضلوا مقبولين.

الواقع بيقول انك مش هتلاقي كل الدواير في حياتك فيها علاقات صحية .. لكن لازم يكون على الاقل فيه دايرة واحدة في حياتك فيها شخص واحد او اتنين بيقبلوك زي ما إنت ..

وفي إعتقادي الشخصي إنك كل ما تشعر انك مقبول .. وتعمل كدا مع ناس تانية حواليك بإنك تقبلهم زي ما هما، وتكون حقيقي بإنك ترفض الخنوع لمتطلباتهم، دا ممكن يلمسهم ويغيرهم مع الوقت، وبالتالي هيوسع دواير العلاقات الصحية والحقيقية في حياتك وهيرفع من عليك ضغوط كتيرة اوي كنت موقع نفسك تحتها.

#دعوة #لتقييم #علاقاتنا
#لهدم #علاقات #مزيفة و #مسيئة
#لبناء #علاقات #صحية
~ سلسلة: خواطري وما تعلمته وأحاول تطبيقه في العلاقات ~

 Jackie.Y.G@