وسط الغيمة والجو المعفر 🌪

وسط الغيمة والجو المعفر 🌪

النهاردة وأنا نازلة رايحة الشغل كلمت البواب ،كالعادة، على العربية اللي بتتمسح أي كلام .. وانا سايقة لقيت نفسي بدأ مزاجي يتعكر وبدأت الغيوم تضلم في دماغي توافقا مع الغيوم اللي بره في الجو واللي بردو ليها تأثير على النفسية زي ما اثبتت دراسات كتيرة.

وبدأت عفرة الأفكار الهايجة في دماغي تحرك كل ذكريات المواقف المتعبة والمزعجة اللي مريت بيها مؤخرا .. وبصراحة لقيت نفسي بسوق وأنا جواية شحنة سلبية وطاقة غضب 😏

ولما وصلت الشغل وركنت.. فضلت ف العربية وانا بحاول ارفع عيوني وأستنجد بالمعونة السماوية .. وانا برفع عيني كان فيه واحد في مبنى الشغل بص من شباك المكتب .. وفجأة لقيت نفسي بعدل وشي اللي كان بدأ يظهر عليه افكاري اللي اخترتها... ولقيت فكرة بتيجي في دماغي من منظر الموظف دا اللي كان بيبص من فوق :

عيني بتبص من فوق على أفكاري وبراقبها .. مش بس كدا، لكن يكون ليا القرار أنهي أفكار تستنى في ذهني وأنهي تطلع بره.

ولما طلعت المكتب وفتحت قراياتي اليومية لقيتها كلها -سبحان الله- بتتكلم عن الغيمة و عن قدرة الإنسان إنه يختار ما بين تركيزه ع الظروف أو إنه يرفع عينه ويركز في أفكار بتجيب سلام ... وفعلا إفتكرت إني أكمل في التدريب اللي بدأته من فترة: إني مكنش ضحية لمشاعري .. لكن أنا اللي أسوقها وأديرها مش هي اللي تسوقني.

👈إفتكر إن مشاعرك هتتبع أفكارك .. وإنت في إيدك تختار أفكارك ..محتاج تكون رقيب عليها وتلاحظ حوارك الداخلي مع نفسك .

👈 مش لازم تكمل حياتك وهما بيقولوا عليك شخص موودي Moody ..يعني متقلب زي الجو الغريب دا بالظبط ..

👈 جواك طاقة نور تقدر تطلعها لما الدنيا تكون مغيمة بره ..وإنت اللي في دماغك القرار يا تشيل الفيشة وتضلم .. يا تنورها بقرار واعي إرادي.

💪 أشجعك تقرأ وتدرب إزاي تدير ذهنك وأفكارك ومشاعرك ..يعني إزاي تدير عالمك الداخلي وتكون سيد نفسك. لا جو يعكرك ... ولا شخص يكفرك 😁

صباحكم #نور و#قرار #بالبهجة و#الفرحة و #الإبتسامة_الحلوة

Jackie.Y.G