إوعى تهرب منها !!

إوعى تهرب منها ..!

بيشوفوها وحش كاسر .. وبيهربوا منها لانهم مش بيطيقوها .. مع إنهم مجربوش يقعدوا معاها ويتعرفوا عليها ... 

عايزة اشاركم النهاردة عن خلاصة بعض النقاط اللي إتعلمتها من صديقتي: الوحدة

* ليه بحس بالوحدة ❓

ربنا خلقك كائن إجتماعي وعلاقاتي .. بتحتاج لوجود الآخر في حياتك .. فإنت عندك إحتياج إنك تتشاف وتتسمع وتتفاعل ..والآخر عنده نفس الاحتياج .. ووجود التفاعل بين اتنين متوافقين زي آلتين موسيقيتين .. لما بيتقابلوا بيطلعوا أحلى نغم.

فيه اسباب كتيرة للإحساس بالوحدة .. من ضمنها:

* إحساسي إني مش متشاف أو مسموع من جوه ... مش شرط من ناس كتيرة ، لكن ساعات بتبقى من حد معين إنت بتحبه ونفسه إنه يفهمك
* إنكسار علاقة مهمة في حياتك
* فقدان شخص عزيز عليك
* ساعات بيكون بعد وقت بذلت فيه مجهود كبير مع حد ..او حتى بعد وقت فيه إنجازات كبيرة وخدمات وشغل كتير
* فترة ما قبل الارتباط .. وخصوصا لما معظم اصدقائك يتجوزوا و المكان يفضى من حواليك .

الاحساس بالوحدة دا إحساس طبيعي بيصيب غالبية البشر لان كل حد فينا متفرد وبيدور دايما على اللي بيشبهه في الإهتمامات ..

لكن تخيل إنك حتى لو وجدت أصحاب بيشبهوك وبيشاركوك إهتماماتك ..بردو هييجي وقت وهتحس بالوحدة .. واكبر دليل علئ كلامي إن زوجات وازواج كثيرين يشعرون بالوحدة حتى بعد الزواج !!

عشان كده العلاج مش في الجواز .. و ملهاش علاقة بعدد أصحابك .. ولا بإن فيه حد بيحبك وقريب منك أو لا ..لانك ممكن يكون فيه ناس كتيرة بتحبك لكنك مازلت شاعر بالوحدة.

مش هوعظك وأقولك زي ما بيقولوا :"إزاي تحس بالوحدة وانت معاك ربنا" ?! ..
لا الكلام دا مش دقيق وبيحسسك بالذنب ..

الوحدة إحساس مهم وصحي جدا لأن هناك أيضا إحتياك بداخلك إنك تستقطع وقت من زحمة حياتك عشان تجلس فيها وتتقابل مع نفسك ..

الوحدة دي صديقتك الحقيقية اللي بتحبك وخايفة عليك وبتزورك عشان تفكرك وتقولك: بقالك فترة كبيرة بتطبطب فيها على كل اللي حواليك.. جه الوقت اللي تطبطب فيها على نفسك... بقالك فترة مشغول بتسمع كل اللي حواليك ..انت دلوقتي محتاج تقعد قاعدة حلوة مع نفسك عشان تنضف نفسك من جوه وترمي كل التراب والوساخات اللي إترمت عليك من بره.

وهنا بييجي ضرورة إنك تقابل الصديقة الصدوق للوحدة: الخلوة

متهربش من إحساسك بالوحدة ..هيكون فيه وقت تحتاج فيها فعلا تتصل بصديق وتخرج خروجة حلوة، لكن في الاغلب وحدة هانم لما بتزورك بتكون زي اللمبة الحمرا اللي بتحذرك انه جه الوقت اللي محتاج فيه تترك كل الأصدقاء وتعمل قاعدة حلوة مع نفسك ومع إلهك اللي بينادي عليك من خلال إحساسك دا عشان يقولك:

"خلقتك كائن إجتمعي لاني عايزك متكونش أناني وتخرج بره نفسك للأخر .. لكن أكبر إحتياج جواك هو تواصلك وتفاعلك معايا ..جوعك وعطشك للأخر في حياتك بيعكس الجوع والعطش الحقيقي ليا أنا. مش هتعرف تتواصل صح مع الناس إلا لما تتواصل معايا .. ومش هتعرف تحب الناس الا لما تحب نفسك ..ليه بتهرب من نفسك في مشاريع وخدمات وأنشطة كتيرة .. ليه مش بتحب نفسك ومش مهتم بيها? إقبل إحساسك بالوحدة وإوعى تهرب منها .. لكن إسمع لصوتها وإهرب لنفسك وليا ..محتاج وقت متعملش فيه حاجة غير إنك تغسل نفسك بالهدوء والموسيقى والتأمل والطبيعة .. ساعتها هتخرج بنشاط وقوة أكبر للناس اللي هيفرق معاها وجودك وسطيها وإنت مليان أكتر من وجودك وإنت فاضي من جواك "

عايزة اقولك: إتونس بنفسك وحبها وإديلها وقت.. لانها الوحيدة اللي هتكمل معاك طريقك

#الوحدة #الحلوة و #الخلوة #حب_نفسك #يحبك_الناس

@ Jackie.Y.G