علاقاتك .. مرايتك

تفتكر إيه السبب الرئيسي وراء المشاكل في علاقاتك ❓❗

تنوعت الاسباب، لكن في رآيي إن السبب الرئيسي واحد وهو إنك (مش بتحب نفسك!!) 

أيون .. إنت قريت صح وأنا كتبت صح : مش بتحب نفسك ..!!

أصل حب النفس دا مش أنانية ..لكن الصورة السليمة لحب النفس يعني إنك تصدق إنك محبوب وغالي ... تستاهل تتحب ..تستاهل تتسمع كويس .. تستاهل الإحترام والإعجاب والتقدير ..

فلو إنت مش بتحب نفسك هيكون إيه شكل علاقاتك?

👈 هتقبل إنك تكمل في علاقات مسيئة لأنك شايف إنك تستاهل تتعامل وحش، ومش هتشوف إن الطرف الثاني مؤذي

👈 هتخاف تغضب لما حد يتجاوز حدوده معاك لأنك شايف إنه عادي لما يدوس عليك ومش هتشوف إن من حقك تتضايق

👈 هتتكسف تطلب مساعدة من حد ..وتعبر عن مشاعرك سواء بخوف او ألم أو إحتياج معين .. ويمكن حتى ترفضها لما تتقدملك بحجة إنك خايف على وقته .. 

👈 او يمكن حتى ترفض أي حب صادق بيتقدملك لأنك مش مصدق إن الطرف التاني مهتم فعلا بيك أو بيحبك من غير غرض

👈 هتحس بالتهديد لما حد يسحب إهتمامه بيك فجأة او تتغير معاملته ليك لأنك بتستمد قيمتك ومحبتك لنفسك من الطرف الأخر ومش هتشوف إن يمكن الطرف التاني هو نفسه ممكن يكون إتسحب منه الحب والاهتمام فجأة في مرحلة مهمة في حياته ؛ فبيعمل معاك إللي إتعمل معاه.

👈 هتشعر بالإنهيار والإكتئاب لما علاقة مهمة في حياتك تنتهي (إرتباط أو صداقة) .. وأقصد إنهيار مش حزن لأن الحزن طبيعي - وربما عدم الرغبة في الدخول لعلاقات مجددا لأنك حطيت كل قيمتك في العلاقة دي وهتقول "أكيد أنا مستحقش أتحب .. او أنا السبب" .. ومش هتشوف دور الطرف الأخر في سبب إنهيار العلاقة (حتى لو إنت كمان كان ليك دور) 

👈 هتحس بالإهانة لما حد ينتقدك او  يتهمك ظلم لأنك معرفتش تفصل بين رأيه عن تصرف معين عملته وما بين إحساسك بقيمة ذاتك اللي أخذت النقد بصورة شخصية كأنه بيقولك _"إنت مش حلو عشان عملت كدا"_ ومش هتشوف نقاط النقد بحيادية وموضوعية.

👈 هتفضل معنوياتك حبة فوق لما تلاقي حب وإهتمام .. وكتييييير تحت  لما تلاقي جفا وقسوة.

👈 هتدمن تلبية طلبات الناس حتى لو إنت فطسان ومش قادر وخلاص هتفرقع بحجة إنك بتحبهم مع ان في الحقيقة يمكن تكون مش شايف دوافعك إنك بتدور إزاي تاخد منهم الحب اللي إنت مش مصدق إنك تستاهله بحاجات تعملهالهم ... ومش مصدق إن من حقك ترتاح وتقول "أسف مش هقدر" من غير ما يتزعل منك.

ليه مش بحب نفسي ?

الأسباب اللي مش بتخلينا نحب نفسنا كتيرة ..أغلبها بيرجع لوقت الطفولة وطريقة معاملة الوالدين ووعيهم لإحتياجات طفلهم النفسية 

في كل مرحلة عمرية (زي اللمس والأحضان والقبلات ، كمان حاجة الطفل للإستقلالية والتفرد وكمان الإعتراض وإن الطفل من حقه يقول لأ ..إلخ)

طب نعمل ايه وإحنا في السن دا عشان نعرف نحب نفسنا اللي متحبتش كفاية وإحنا أطفال?

1- حاول إنك تدرس أكتر عن نفسك وتتعرف عليها عشان تقدر تميز أي نوع من الحرمان أو الإساءات إتعرضت ليه في طفولتك ..فمع المعرفة بييجي الوعي ودا بيجهز لخطوات الشفاء .. وهنا ييجي دور القراءة وكورسات المشورة .. فالهدف مش إنك تتألم وخلاص لكن إنك تتشفي، ولا الهدف إنك تفضل تعيش في الماضي؛ لكن الهدف إنك تقطع السلسلة الخفية إللي ربطاك ومخلياك مش عارف تتحرك بحرية وإنطلاقة في حياتك نتيجة حاجات مدفونة في عقلك اللاواعي من إساءات الماضي وعمالة تتحكم في أفكارك التلقائية وتصرفاتك.

👍(هنا أرشحلكم الكتاب الرائع: ذنوب الأباء ومسئولية الأبناء - مشير سمير)

2- يكون فيه ولو شخص واحد في حياتك بيقبلك زي ما إنت وبيحبك بجد .. شخص قادر يفصل ما بين تصرفاتك اللي مش دايما بتكون تمام ..وبين ذاتك اللي شايفها حلوة وجميلة ومتقدرة لكنها بس بعافية شوية بسبب اللي إتعرضت ليه .. شخص بيحترمك وبيقدرك لذاتك.. مش لإنجازاتك ..شخص بيواجهك بعيوبك وبكلامك السلبي على نفسك بمحبة لمصلحتك مش لمصلحته 

3- طبعا العلاقة مع الله هي الاساس مع كل الخطوات السابقة ..فالله عليه الدور الاكبر إنه يساعدك وينورلك نفسك وطريقك ويرشدك تروح فين وتعمل إيه   ..لكن دا مش هيلغي دورك وسعيك وبحثك .. هو عليه يحط وسائل المساعدة في طريقك (كورس - شخص بيحبك - وعظة - كتاب) وإنت عليك تقبل وتستقبل الحاجات إللي هتقابلك في طريقك او الأشخاص إللي هيحطهم مخصوص في طريقك.

عشان تعرف تحب الناس وعشان تبتدي تكون علاقات حقيقية في حياتك تستمتع فيها بحب الناس ليك ... يالا إبتدي إتعلم إزاي تحب نفسك 

@ Jackie.Y.G