وانا بسأل ازاي اوصل لشارع معين سمعت رأيين من ٢ مارة بالشارع .. لكني من جوايا مكنتش حاسة إن كلامهم صح . فقررت أتبع حدسي ومكنش عندي مشكلة إني أستكشف وأتمشى شوية .. والحقيقة حدسي طلع صح وكانوا هيتوهوني ..
الحقيقة الأهم من ورا دا إني متعلمتش بالسهل إن أسمع صوتي الداخلي لكن دا حصل من بعد تعرضي لعدة مواقف سخيفة في مكان مُسئ جدا .... ووقتها مكنتش بسمع لصوتي الداخلي واللي كان بيقولي وقتها فيه حاجة غلط في المكان لكن انا كنت بكدِّب نفسي وفضَّلت اني أصدق اللي عينيا شايفاه مش حدسي .. لكن من بعد الفترة دي ومن بعد ما خرجت وتحررت من المكان دا تقوى جوايا جزئية تواصلي مع صوتي الداخلي .. الصوت اللي بنتولد بيه بشكل قوي لكنه بيخفت مع الوقت لما المجتمع والبيئة المحيطة تفضل تفطسه لما تعلمك إنك لازم تمنطق كل حاجة بالمنطق إللي إنت أصلا متعلمه من المجتمع وإللي مفيهوش أي منطق (لو مكنتش بدأت تشتغل على تصحيح دماغك وتطبيق إللي بتتعلمه) أو تفطسه لما تتجاهل صوت الحدس لأن مفيش حد علمك أهميته وإزاي تسمعه .. الصوت اللي أكيد مش بنتبعه بشكل أعمى لكن بنحترمه وبنقرر في أوقات إننا نغامر ونصدقه .. واللي زي النهاردة مخذلنيش لكن علاقتي بيه بتقوى بالعشرة وبعد عدة مواقف في ضوء معايير معينة..
اللي عايزة أقوله هنا حاجتين:
١- طبعا طبعا محدش فينا يحب إنه يعدي بمواقف سخيفة أو مسيئة .. لكن بسبب طبيعة الحياة اللي عايشينها في عالم ساقط فيه ناس مش مشفية للأخر وبتعدي الآخرين بإضطرابها، لكن ازاي هنتصرف بعد ما نعدي بالمرحلة السخيفة دي هو الأهم واللي بيشكل كل الفرق في حياتنا
٢- محتاجين نتعلم إن بعد ما بنتعرض لمواقف سخيفة أو صادمة مش فقط اللي بيحصل هو أننا بنتجرح أو بنتأذي ..#لأ .. دا بعد مرور وقت بتكتشف إنه بيحصل كمان إزدهار وتفجر لمواهب وطاقات مكنتش تتخيل إنها موجودة جواك .. ومش ببالغ لو قلت انها مكنتش هتطلع بالشكل والجمال دا من غير مرورك بأوقات ضاغطة أو سخيفة .. ودا اللي في مجالي في علاج الصدمات بيطلقوا عليه عبارة: "نمو ما بعد الصدمة"
Post Traumatic Stress Growth (PTSG)
والتي تلي مرحلة "كرب ما بعد الصدمة"
Post Traumatic Stress Disorder (PTSD) واللي مش لازم تحصل لكل الناس بعد تعرضهم لمواقف صادمة .. لكن عادة اي موقف ضاغط لو تعاملنا معاه صح بعد ما نعدي بمرحلة فيها بمشعر بلغبطة (من حقك تحس بكدا) بنختبر رؤية كنوز وجواهر بتجعلنا ننسى كل ألم مرينا بيه وقت من الأوقات.
متخافش .. وصدق دائما اللي جاي أحسن لأنك هتحصد إللي هتؤمن بيه🌹
You will receive what you believe
دمتم معافين ولصوت حدسكم الداخلي حساسين
